Malamh

اضطر دعبس أفندي أنه يتأخر كتير قبل ما يرجع البيت علشان يضمن انه يرجع في وقت تكون زوجته وأولاده نايمين.

طبعاً بعد البدلة الجديدة ما اتحرقت،

فتح الباب بهدوء.. ودخل يتسحب وهو بيقول بينه وبين نفسه...

حلو.. البيت هس هس، المهم تكون دواهي نايمة، نامت عليها حيطة بحق قادر مقتدر.

طول اليوم هات.. هات، تقولش أبو دعبس جاب دعبس للدنيا علشان يشتغل عندهم مرمطون، آه لو شافت البدلة اللي اتحرقت، ولاّ الجزمة اللي اتقطعت.. قال دواهي قال.. الله يرحمك يا سي السيد.. ياللي اتقهرنا من بعدك،

فين أول ما اتجوزنا وفين دلوقتي.. كانت عاملة زي العروسة الحلاوة، أحمر واخضر واصفر وحاضر يا سي دعبس.. أوامرك يا سي دعبس.

بس أنا الغلطان.. اصل الستات دول جنس ملعون.. لازم يتحكم بالحديد والنار، ويقولوا قال حرية المرأة... بلا نيلة، الواحدة من دول تبقى هتموت وتتجوز.. تعقد تتدحلب تتدحلب ولما يطب الزبون يبقى يا ولداه زي الفار اللي وقع في مصيدة، مهر وشبكة وشقة وعفريت أزرق كأنهم لقوا كنز.

ومنين يجيب الغلبان.. طبعاً لازم يطفش، ويرجعوا يصدعوا دمغنا بمشكلة العنوسة، حاجة تجن الجن .. وتعفرت العفريت.

وإيه الكتب دي؟؟.. أكيد بتوع الواد شكروت.. عاملي فيها مثقف..

الثورة الدائمة.. لينين والثورة في الشرق.. الاشتراكية الحديثة.

الواد فاكر نفسه جيفارا.. وهو بالعافية يعرف الفرق بين الألف وعمود النور،.. مش فالح بس غير في قلب دمغنا بالأغاني اللي عاملة زي صوت مواتير شركة الحديد والصلب، لا والأكادة إن كلهم شبه بعض وكتير... بقي المطربين أكتر من السميعة، ويقعد الواد يسمعهم كأنه بيسمع أم كلثوم يا خي.

وإيه الكتاب ده كمان.... الثقافة الجنسية ؟؟!!

يا ابن ستين كلب يا شكروت..

ولا ليه، ما هو كتر خيره.. طول الليل والنهار قالبين دمغنا بالثقافة الجنسية في التليفزيون والصحافة والكتب، عاوزين يخلوها حاجة عادية.. وهو ده التمدن والحضارة، ويا كده يا نبقى متخلفين.. ربنا يخلي هالة سرحان وإيناس الدغيدي.. ويكرمهم زي ما كرم السادات.

آه طبعا لابد من محو الأمية الجنسية، وكأنهم محو أمية 49% من الشعب.. والباقي متعلمين نص كوم، الواحد من دول يتخرج من الجامعة حامل شهادة عليا ولو سألته مين اللي فتح مصر يقولك أبو تريكه.

الله يرحم زمان.. كان الواحد وشه بيحمر لما يسمع كلمة جنس، دلوقتى بقت عاملة زي اللبانة، وعادي جداً لما نتكلم فيها أمال.. بلاش تخلف يا راجل.. لا حياء في العلم.

طيب يتشطروا علي العلم اللي بجد، ولا هم عاوزين يعملوا زي أهل بغداد يقتلوا الحسين وبعدين يسألوا عن دم البرغوت إذا كان ينقض الوضوء.. عالم غريبة فعلاً.

بس سيبك انت.. دلوقتي ادخل اتسحب من غير دواهي ما تحس، بدل ما تبقى ليلة مش فايته،

- أي... آااااااااه.......

************

رابط الحلقة الأولى من هنا

الحلقة الأولى .. رائحة شياط في قهوة النشاط