اضطر دعبس أفندي أنه يتأخر كتير قبل ما يرجع البيت علشان يضمن انه يرجع في وقت تكون زوجته وأولاده نايمين.

طبعاً بعد البدلة الجديدة ما اتحرقت،


فتح الباب بهدوء.. ودخل يتسحب وهو بيقول بينه وبين نفسه...



حلو.. البيت هس هس، المهم تكون دواهي نايمة، نامت عليها حيطة بحق قادر مقتدر.

طول اليوم هات.. هات، تقولش أبو دعبس جاب دعبس للدنيا علشان يشتغل عندهم مرمطون، آه لو شافت البدلة اللي اتحرقت، ولاّ الجزمة اللي اتقطعت.. قال دواهي قال.. الله يرحمك يا سي السيد.. ياللي اتقهرنا من بعدك،


فين أول ما اتجوزنا وفين دلوقتي.. كانت عاملة زي العروسة الحلاوة، أحمر واخضر واصفر وحاضر يا سي دعبس.. أوامرك يا سي دعبس.


بس أنا الغلطان.. اصل الستات دول جنس ملعون.. لازم يتحكم بالحديد والنار، ويقولوا قال حرية المرأة... بلا نيلة، الواحدة من دول تبقى هتموت وتتجوز.. تعقد تتدحلب تتدحلب ولما يطب الزبون يبقى يا ولداه زي الفار اللي وقع في مصيدة، مهر وشبكة وشقة وعفريت أزرق كأنهم لقوا كنز.

ومنين يجيب الغلبان.. طبعاً لازم يطفش، ويرجعوا يصدعوا دمغنا بمشكلة العنوسة، حاجة تجن الجن .. وتعفرت العفريت.


وإيه الكتب دي؟؟.. أكيد بتوع الواد شكروت.. عاملي فيها مثقف..

الثورة الدائمة.. لينين والثورة في الشرق.. الاشتراكية الحديثة.

الواد فاكر نفسه جيفارا.. وهو بالعافية يعرف الفرق بين الألف وعمود النور،.. مش فالح بس غير في قلب دمغنا بالأغاني اللي عاملة زي صوت مواتير شركة الحديد والصلب، لا والأكادة إن كلهم شبه بعض وكتير... بقي المطربين أكتر من السميعة، ويقعد الواد يسمعهم كأنه بيسمع أم كلثوم يا خي.


وإيه الكتاب ده كمان.... الثقافة الجنسية ؟؟!!

يا ابن ستين كلب يا شكروت..


ولا ليه، ما هو كتر خيره.. طول الليل والنهار قالبين دمغنا بالثقافة الجنسية في التليفزيون والصحافة والكتب، عاوزين يخلوها حاجة عادية.. وهو ده التمدن والحضارة، ويا كده يا نبقى متخلفين.. ربنا يخلي هالة سرحان وإيناس الدغيدي.. ويكرمهم زي ما كرم السادات.

آه طبعا لابد من محو الأمية الجنسية، وكأنهم محو أمية 49% من الشعب.. والباقي متعلمين نص كوم، الواحد من دول يتخرج من الجامعة حامل شهادة عليا ولو سألته مين اللي فتح مصر يقولك أبو تريكه.


الله يرحم زمان.. كان الواحد وشه بيحمر لما يسمع كلمة جنس، دلوقتى بقت عاملة زي اللبانة، وعادي جداً لما نتكلم فيها أمال.. بلاش تخلف يا راجل.. لا حياء في العلم.

طيب يتشطروا علي العلم اللي بجد، ولا هم عاوزين يعملوا زي أهل بغداد يقتلوا الحسين وبعدين يسألوا عن دم البرغوت إذا كان ينقض الوضوء.. عالم غريبة فعلاً.


بس سيبك انت.. دلوقتي ادخل اتسحب من غير دواهي ما تحس، بدل ما تبقى ليلة مش فايته،


- أي... آااااااااه.......




************


رابط الحلقة الأولى من هنا

الحلقة الأولى .. رائحة شياط في قهوة النشاط



5 comments

  1. يا حرام صعب عليا دعبس افندى شكله خد علقة تمام

    بس ممكن افهم حاجة ليه دايما الرجالة بيقولو ان الستات بيضربو ازواجهم؟ دا فين دا ؟

    ياريت تطمنى يا هانى على دعبس افندى ويارب تكون الاصابة مش خطيرة

    لتانى مره هاقولك المدونة جميلة اوى وعاجبانى جدا

    6/4/09 14:29

     
  2. الصورة حلوة اوى:) ممكن احفظها عندى؟

    6/4/09 15:34

     
  3. الله يرحمك يا سي السيد.. ياللي اتقهرنا من بعدك،

    ههههههههههههههههههههه
    اتقهرتوا برضه

    --------------
    أنا الغلطان.. اصل الستات دول جنس ملعون.. لازم يتحكم بالحديد والنار،
    --------------

    شكرا شكرا
    شايل م الستات اوى دعبس افندى ده
    يستاهل اللى هيجراله بقى
    هو اللى جابه لنفسه
    ههههههههههههههه


    خالص ودى
    سالى

    8/4/09 05:28

     
  4. اهلا بيكِ يا ريم
    الستات بيضربوا أزواجهم دا فين؟؟ الله أعلم
    لكن هى ما كانت تقصد تضربه، ود اللي هاتعرفيه في الحلقة الجاية
    وشكراً على رأيك في المدونة واللي اتمنى انك تشاركينا فيها

    -------------

    طبعا يا موناليزا
    الصورة والمدونة كلها تحت أمركِ

    --------------

    يا سالي طبعا الرجالة اتقهروا بعد سي السيد
    بأمارة قانون الأحوال الشخصية الجديد
    والخلع .. وما ادراكِ ما الخلع
    ومعلش على حكاية الجنس الملعون ..
    لكن اللي ايده في الميه مش زي اللي ايده في النار :)

    خالص التحية

    8/4/09 10:43

     
  5. يا راجل انت هتكمل دعبس افندى هنا
    ماشى يا عمنا
    بس يارب متقطعش زى المره اللى فاتت بعد ما شدتنا لدعبس وبعدين خلعت...واخد بالك انت من خلعت دى
    ههههههههههه

    25/5/09 11:45

     

Post a Comment