Malamh

آسف على الإزعاج .. مدخل لفهم الفصام

فيلم آسف على الإزعاج هو واحد من الأفلام اللي بالفعل نقف قدامها احترام

صحيح إن الفكرة قال عنها النقاد انها مقتبسة من فيلم

Beautiful Mind واللي قام ببطولته بعبقرية الممثل راسل كرو، لكن برضه فيلم آسف على الإزعاج قدمه أحمد حلمي بعبقرية، لأنه فعلاً من فئة الممثلين العباقرة.

وبعيداً عن إن الفيلم نفسه يحمل لي ذكرى عمري ما هانساه، لكن مش صحيح إن فكرته مقتبسة من الفيلم الأجنبي لمجرد انهم اشتركوا فقط في الخط العريض وهو مرض الفصام.

شادية قدمت فيلم قديم شوية اسمه ( ذات الوجهين ) تناول نفس الفكرة،

كمان بعض كتابات ديستوفسكي – كاتب روسيا الكبير - اتكلمت عن الفصام،

والعديد من الأعمال الأدبية والسينمائية أخدت نفس الزاوية،

يعني باختصار خطأ اننا نبخث مؤلف فيلم آسف على الإزعاج حقة في انه أبدع فيلم جيد.

الأغنية الموجودة في أول الموضوع هى أغنية ( هاتعمل ايه ) وغنتها شرين، وكانت الحصان الأسود في الفيلم

تقدر تحملها من هنا

هاتعمل ايه – شرين – من فيلم آسف على الإزعاج

تقدر كمان تحمل الفيلم كله من هنا

آسف على الإزعاج الجزء الأول

آسف على الإزعاج الجزء الثاني

آسف على الإزعاج الجزء الثالث

آسف على الإزعاج الجزء الرابع

طبعا احنا بنحمل الأجزاء الأربعة، وهى بتكون في شكل ملفات مضغوطة، وبعدين بنفكها ببرنامج Winrar علشان ينتج ملف واحد هو الفيلم.

**********

لكن المهم هو إني عاوز أتكلم معاك عن

مرض الفصام Schizophrenia

فيه خطأ شائع إن مرض الفصام هو ازدواج الشخصية، يعني المصاب به يكون له شخصيتين، لكن طبعا ده خطأ لأن الفصام هو مرض الانفصال عن الواقع، وبيكون بسبب اضطرابات وجدانية عنيفه بتخلي صاحبها ينعزل عن الواقع المحيط به ويعيش في أحلامه لدرجة انه بيشوفها هى الواقع،

بيقابل ناس، ويعرف ناس، ويعيش أحداث كلها في خياله لكن بالنسبه له بيكون فاقد القدرة على التمييز بين الخيال والواقع.

أعراض الفصام هى الانعزال عن الناس والخوف منهم، والاعتقاد بانه مكروه أو فيه ناس بيتأمروا عليه،

وبرود الأعصاب، وردود أفعل غير متناسبة مع الموقف يعني ممكن يضحك بسبب شيء مبكي والعكس، كمان عدم الاهتمام بالمظهر والتصرفات غير المحسوبة مثلاً ممكن يروح الشغل بالشبشب،

كمان في احيان كتيرة المريض بيتكلم مع نفسه بصوت عالي، مش بطريقة عادية لكن هو فعلاً بيكون شايف ناس وسامعهم وبيتكلم معاهم.

وعلى فكرة مفيش حد غير معرض لهذا المرض خصوصاً مع كل الضغوط المحيطة. وكل 100 شخص في العالم بينهم واحد مصاب بمرض الفصام.

المرض ده.. ومن معرفتي له عن قرب، عرفت أن هدفه غالباً هم أصحاب العقول المميزة .. ( ولولا كده كنت اعتبرت نفسي واحد من المصابين بيه )

وبعيداً عن أي اسلوب علمي .. هو مرض بشع بكل معنى الكلمة،

أصعب خطوة في علاجه هى إن المريض يكتشفه، ويعرف إنه مريض بالفصام، وهنا بتبدأ رحلة من العذاب،

لأنه بيكتشف بعد الشفاء إن كل الأشخاص اللي تعامل معاها، وحبهم وحبوه..

كل الأحداث المؤثرة اللي مر بيها..

كل ده ملوش وجود إلا في عقله فقط،

يعني بيكتشف إن حياته كلها كانت مجرد سراب، كأنها أحلام يقظة تجسدت قدام عنيه.

مرض الفصام يُعتبر – ومن وجهة نظري الخاصة – من أصعب الأمراض النفسية

لأنه بيعزل روح المريض تماماً عن الحياه،

بيخليه موجود بين الناس ... مجرد جسد بدون روح.

كلمات الأغنية بتقول:

هاتعمل ايه لو نمت يوم وصحيت..

بصيت..

وشوفت نفسك في المرايا بكيت

جواك سؤال تصرخ تقول انا مين؟ .. انا مين؟

أنا زي ما أنا ولا اتقسمت اتنين

وبعدين؟ .. بعدين؟

قول ياللي في المرايا

فهمني إيه الحكاية؟

فرحان؟ .. تعبان؟ .. مرتاح؟ .. ندمان؟

حاجات كتير في حياتنا

اتسببت في حيرتنا

وادينا عايشين.. راضيين..

جايين .. ورايحين

هاتعمل ايه لو نمت يوم وصحيت..

ولقيت..

أقرب ما ليك في الدنيا مش حواليك

هو انت مين اللي عمل كده فيك؟

مش انت ولا فيه حد غما عنيك؟

وبعدين؟ .. بعدين؟

قول ياللي في المرايا

فهمني إيه الحكاية؟

فرحان؟ .. تعبان؟ .. مرتاح؟ .. ندمان؟

حاجات كتير في حياتنا

اتسببت في حيرتنا

وادينا عايشين .. راضيين..

جايين .. ورايحين

عد النجوم واحسب البرج .. وبيـَّـن زيـــــن

مش قلت لك برنامج تحفة لعشاق السماء والفلك.

************

تعالوا نكتب صح

أول ما فكرت في قسم الملامح التعليمية؛ كان في ذهني شرح كيفية تطوير المدونات، من تعديلات الكود، وحتى تنسيق الرسائل، لكن أظن ان البداية لازم تكون من البداية.. وهى اننا نكتب لغة صحيحة قدر الإمكان،

وموضوع اللغة.. هو موضوع ضخم، وصعب جداً الاختصار فيه،

علشان كده انا مش هاتكلم عن اللغة، لكن هاتكلم عن بعض أخطاء لما نصلحها هانوصل للحد الأدنى من اللغة الصحيحة،

والحد الأدنى؛ لأن بمنتهى البساطة قانون الزمن فرض علينا لغة معينة نستخدمها، وهى اللغة أو اللهجة العامية، وانتشر جداً استخدمها على الشبكة العنكبوتية سواء شئنا أم أبينا،

في المجموعات البريدية، والمنتديات، والمدونات، وحتى بعض المواقع المحترمة،

ومادام جرت العادة على اعتبار اللغة أو اللهجة العامية أحد افرازات العصر وموجوداته فلا ضير من استخدامها، ولكن المشكلة في أن ما يزيد عن الحد ينقلب للضد،

فليس المطلوب استخدام مفردات من بطون المعاجم؛ لأننا لو استخدمناها في غير مكانها الصحيح هنشعر اننا هاربين من أيام الدولة العباسية، أو من العباسية نفسها.

ولكن على الأقل استخدام لغة بسيطة، سهلة.. وسلسة، وصحيحة أيضاً قدر الإمكان.

فتعالوا بدون مقدمات، ورغي كتير نشوف ايه هى الخطاء اللي ممكن نقع فيها، ومفروض اننا نصلحلها.

اسم الإشارة المؤنث:

من الخطأ اني أكتب اسم الإشارة المؤنث.. انتي

لكن الصح ( أنتِ ) كأني بأخاطب مذكر لكن بوضع كسرة تحت التاء للتمييز

نفس الشيء ( لكِ – منكِ – عليكِ – شعركِ – تحتكِ ... وهكذا )

***

الهاء ( ه )، والتاء المربوطة ( ة )

أفضل طريقة للتفرقة بينهما هي كتابة كلمة بعدها، يعني كلمة تصل المعنى

وفي الحالة دي هانشعر بنطق الحرف إذا كان هاء أو تاء

مثلا: الله أكبر ( ظهرة في النطق اللهـ أكبر )

وبالمثل: ( مياه البحر – أفواه وأرانب – منه أتعلم – فيه إفادة .. وهكذا )

كذلك: أمة الخير ( ظهرت في النطق .. أمت الخير )

وبالمثل: ( رغبة الحياة – خارطة الطريق – عالية الهمة .. وهكذا )

***

الياء ( ي )، والألف المقصورة ( ى )

الياء هي التي تظهر في النطق ياء صحيحة ( ياء تحتها نقطتين )

مثل: شخصي ، عيني ، في ، تحذيري ، معي

أما الألف المقصورة فهي التي تظهر في النطق ألف ( ياء ليس تحتها نقاط )

مثل: منتهى، ملتقى، على ، حتى ( لاحظ أنها ظهرت في النطق .. منتها، ملتقا، علا، حتا )

***

همزة الوصل ( ا )، وهمزة القطع ( أ )

الهمزة بحر كبير، لكن باختصار معظمنا بيخلط بين همزة الوصل ( ألف ليس فوقها همزة )، وهمزة القطع ( ألف وفوق منها همزة )

وأفضل طريقة لمعرفة المفرق هى إضافة حرف ( واو) قبلها فإذا ظهرت الهمزة في النطق كانت همزة قطع.

مثل: ( أنت، أيام، أين ) لو أضفنا واو قبل ( أنت ) لازم نشعر بوجود ألف في كلمة أنت في النطق

وإذا لم تظهر الألف في النطق كانت همزة وصل

مثل: ( ابدأ، انبهار، اختيار ) لو اضفنا واو قبل كلمة ( ابدأ ) هايختفي الألف تماماً في النطق، وهاننطقها ( وبدأ )

***

أما علامات الترقيم، فهى مهمة جداً، لأنها تعتبر تنسيق جميل للعبارات.. وهى:

النقطة ( . )

وتوضع لختام جملة ما، ثم نبدأ بعدها كتابة جملة ثانية لا تتصل بما قبلها

وهذه النقطة تسببت في تغيير حكم بالنفي على أحد الشخاص

ففي ذات يوم أصدر أحد القياصرة الروس وهو الكسندر الثالث حكماً بالنفي على أحد الاشخاص،

هذا الشخص كان من المقربين إلى زوجة القيصر، فغيرت فقط مكان النقطة،

كان القرار يقول " عفونا مستحيل. يرسل إلى سيبيريا "

فغيرت هى مكان النقطة، قأصبح القرار يقول " عفونا. مستحيل يرسل إلى سيبيريا "

شفتم النقطة مهمة قد ايه؟

***

أما الفصلة ( ، )

فنستخدمها لتقسيم الجملة

مثل: ناديتُ ما ردت، صرختُ ما ارتدت، وظل صوتي يتلاشى في تلاشيها، خلف الموجة الحاسرة.

***

الفصلة المنقوطة ( ؛ )

فنستخدمها لفصل نتيجة عن سبب

مثل: ضحك من أعماقه؛ حتى يداري أحزانه.

ناخد بالنا كمان إن علامات الترقيم بتكون شابكة في الكلمة بدون مسافة، ما عدا شرطتى الجملة الإعتراضية بيكون فبلها وبعدها مسافة.

والجملة الاعتراضية

هى اللي بتكون في وسط الجملة لكنها غير متصلة بالمضمون، وحذفها لا يخل بالمعني، وبتكون بين شرطتين ( - .. - )

مثل: كان يعرف ان الأحلام مستحيلة - هذا ما قاله - لكنه ظل يحلم.

***

فيه كمان تشكيل مهم على حرف التاء

لاحظ هذه الجملة: قتلت الأطفال الأبرياء.

هل المقصود هو انني قتلتُ الأطفال الأبرياء، أم أني أتحدث امرأة قتلت الأطفال الأبرياء.

اللي يفرق هنا هو التشكيل على حرف التاء،

لو ضم ( قتلتُ ) يبقى أنا باتكلم عن نفسي، ولو فتح أو كسر مثلاً يبقى باتكلم عن امرأة.

بالمثل: رأيتُ الله - سمعتُ الحق - قراتِ القرآن .. وهكذا

وللي مش عارف فين التشكيل على لوحة المفاتيح فاحنا بنضغط زرار shift مع التثبيت وبعدين بنضغط معاه على زرار

ق للضمتين - ث للضمة - ص للفتحتين - ض للفتحة - س للكرسرتبن - ذ للشدة - ش للكسرة - والهمزة للسكون

وكفاية كده علشان الملل، لكن المهم نعرف إن العلم نور

مش نعمل زي واحد أعرفه بدل ما يكتب العلم نور، كتبها ( العلم نعور )