بقلم: مصطفى ريان

مدونة: إبداعات شاب ثائر

---------------------------------------------


أول من أبدع الرباعيات هو العبقري صلاح جاهين،

لكن رباعياته طبعاً كانت خالية من مفردات زي

شاب نايتي، شات، مزة .. وغيرها من المفردات واللي قد يعتبرها البعض اسفاف وابتزال والكلام الكبير ده، لكن أنا شخصياً باعتبرها صدق في سرد روح العصر، والزمن اللي عايشينه.


أي حد ممكن يقرأ رباعيات مصطفى ريان لازم يقتنع أن كاتبها شاب مصري عايش في بدايات القرن العشرين، ويحمل بداخله كل الصراعات السيكلوجية اللي سببها نظام سياسي واقتصادي مُحبط لأبعد حد،

وكان السبيل الوحيد للهروب من هذا الإحباط هو مسايرة روح العصر، خاصة بعدما استقرت المعرفة في الرأس.

معرفة حال أمه كاملة.. تايهة وفقدت هويتها.


أترككم مع إحدى إبداعات شاب مصري..


---------------------------------------------




لو كنت لاعب كورة مش شاعر أو أديب

مش كان اتغير حالي وبقى مني القرش قريب

وبقيت حديث الناس ووسائل الإعلام

إيه يعني كاتب عظيم لكني خالي الجيب


***




انا مش شاب نايتي .. دة انا شاب جامد قوي

واعرف اجيب التايهة وامشي في طريق ملتوي

واذا كنت ابان قصادك طيب وابن حلال

مابينضحكش عليا ولا دراعي دة بيتلوي


***



قطعت كل علاقتي بالشيء اللي اسمه شات

وركزت معاكِ انتِ ونسيت كل اللي فات

وقلت ابدأ معاكِ حياة ودنيا جديدة

لكن لاقيتك زيكِ زي غيركِ من البنات


***



قابلت صاحب ليا ماقبلتوش من زمان

وكنت عايز اجري اخده بالأحضان

لكنه سلم عليا بمنتهى الفتور

أنا مش زعلان منه .. ماهو دة حال الزمان


***




واحدة زنجية وشاب أبيض زي اللوز

وفضلت أنا اتخيل لحظات وشكل البوس

لذيذ النسكافيه بالحليب .. لكنه ساعات بيتعب

ويجوز اضحي باي واحدة .. لكن بصحتي أبداً لا يجوز


***



خلاص خلصتي كلامكِ طيب اسمعيني

عاشق وبجد عايزكِ تعيشي معايا سنيني

وإذا كان ليا ماضي زي جميع الرجال

نسيت انا كل الماضي اول ما شفتكِ بعيني


***




يغور اللبن يا حبيبتي من وش القرد

دة انا عشت معاكِ ليالى كانت صعبة وكرب

عايزة تمشي ماتمشي

وياريت حتى لو تمشي من دلوقت


***




انا والعذاب وهواك عايشين لبعضينا

قولي اعمل ايه وياك في قصة هوانا الحزينة

بتحبني ولا دي اشتغالة ووهم

واركز معاك ولا انسي ليالينا


***




اول بنت عرفتها كانت اسمها دينا

كانت شوية متختخة لكن كانت جميلة

واتفرقنا وبعد سنين قابلتها في الجامعة

ماعرفتهاش اصلها كانت شبه نينة


***



فكرت في كل كلمة يا حبيبتي قولتيها ليا

لاقيت اللي عايزاه مني بجد صعب عليا

صعب اخطبك واسافر وانتِ تستنيني

ولا ابقي حاسس بيكي ولا تبقي حاسة بيا


***


7 comments

  1. مصطفي ريان

    اخي هاني اشكرك يا جميل على الصور والشغل الجامد اللي عملته للرباعيات عندك في المدونة ويارب يعجب القراء الافاضل بتوعك
    تحياتي ومحبتي ليك

    4/4/09 21:25

     
  2. اشكرك جدا على حسن الاختيار

    4/4/09 21:30

     
  3. أنا اللي مفروض يشكرك يا درش
    لأنك عارف اني مُعجب برباعياتك من زمان

    ------------------

    الشكر لله أولا يا موناليزا، ثم لصاحب الرباعيات، ثم لكِ على المرور الجميل

    6/4/09 12:29

     
  4. mk

    حقيقي كلمات جميلة احييك عليها والى مزيد من الرباعيات بمفردات هذا العصر لانك كما قلت تمثل هذا الجيل .

    6/4/09 16:11

     
  5. مصطفي ريان

    موناليزا - هاني - mkاشكركم جميعا ويارب اعمل شغل احلى واحلى ويعجبكم اكتر

    7/4/09 13:31

     
  6. انا بحب اوى الرباعيات .. عجبنى اكتر من واحدة انت كاتبهم .. بس اكتر واحدة
    قطعت كل علاقتي بالشيء اللي اسمه شات

    وركزت معاكِ انتِ ونسيت كل اللي فات

    وقلت ابدأ معاكِ حياة ودنيا جديدة

    لكن لاقيتك زيكِ زي غيركِ من البنات

    2/5/09 13:08

     
  7. ازيك يا مصطفى يا ريان
    يا مبدع
    يا بتاع مجلة ميكانو
    فاكرني؟؟؟
    طولت الغيبة عن مدونتي
    عايزة اقولك ان اللي كاتب الرباعيات المعاصرة دي
    ممتاز فعلا
    ربنا يوفقه
    مصر ولادة يا جدعان

    21/8/09 19:58

     

Post a Comment