إذا اعتبرنا ان المنظرة شيء كويس.. يبقى على الأقل نتمنظر بشياكة.. أو نتردم ونتلهي على عنينا ونعيش عيشة أهالينا

يعني مثلاً مش علشان بأحب.. وعاوز أرسم نفسي أروح أجيب هدية للي بحبها

وأكتب عليها بكل فخر Gust for you

أو أشتري توك توك وأكتب عليه I MES YOU

ولا إن مسئولي الوحدة المحلية في مدينة الزقازيق يكتبوا على اللافتة اللي بيقراها العالم كله Zagzig City


بلاش الإنجليزي.. هانقول إنها لغة فرنجة

طيب والعربي كمان؟؟

توصل إن كلمة شوك – جمع شوكة – تتكتب ( شوق )

ذكرتني والله بصحفي كبير كأن بيدرس لنا محاضرة عن استخدام اللغة الصحفية السليمة، وكان ينطق كلمة الطب .. ( التب )

إذا كنا شعب جاهل.. فهذا ليس عيباً، لأننا نستطيع أن نتعلم. ولكن المشكلة أننا أصبحنا شعب جاهل.. ومكابر أيضاً


في موضوع ( الموبايل للجميع ) اتكلمت موناليزا عن الموبايل ومنظرة الموبايل

لكن الغريب أننا ممكن نسمع نغمة موبايل عبارة عن صوت كتاكيت، أو قطة، أو صوت حمار

أي والله صوت حمار.. يعني أنكر الأصوات بقت نغمة

بالله عليكم .. فيه مسخرة أكتر من كده؟

ونرجع نستغرب أحنا ليه متخلفين؟


لأننا لازم نواجه نفسنا بأخطائنا الأول.. بقصورنا وعجزنا

لازم نتعرى قدام نفسنا، وكفاية بقى نضحك على روحنا بكلام فارغ وعبارات رنانة لا بتودي ولا بتجيب

عموماً الملف الصوتي اللي في بداية الموضوع هو قصيدة عبقرية أرسلها لي شخص عزيز جداً على قلبي، وجمعت بين اللغة العربية واللغة الإنجليزية

اسمعوها واضحكوا بدل ما نبكي، وشوفوا ازاي جملة ( أحبكِ حباً ) لما ترجمت إلى الإنجليزية؛ تحولت بقدرة قادر إلى ( ألوفك لوفاً )


لله في خلقه شئون.. وأترككم مع الصور

ولكم التحية،














موضوع ذا صلة:

شر البلية ما يضحك – الجزء الأول

3 comments

  1. حاجة تزعل بجد
    معقول وصل التدهور بلغتنا العربية لهذه الدرجة
    انا لله وانا اليه راجعون

    24/4/09 16:55

     
  2. بدأت الأول بقراءة موضوعك .
    ومعاك حق فى كل كلمه كتبتها .. لكن زى ما فى ناس كده . فى ناس تانيه مثقفه جداوبدون اى مكابرةحتى لو كانوا أقليه . لكن موجودين بالفعل .
    لأن الجاهل هو اللى محتاج يظهر نفس غير نفسه . علشان مايتعبش حد ولا يتعب نفسه من حقيقته .
    ودول بيكون عندهم عقدة الخواجه . لازم نتكلم وانكتب انجليزى حتى لو مش عارفين .. مش مهم المهم اننا نتعامل بيه وخلاص ..
    وبخصوص القصيدة . فبجد رووووعه .. واللى قالها استاذ :)
    جمع بين كذا لغه وبأسلوب رهيب
    تقريبا الأسلوب ده مفيد جداا فى تعليم اللغه للأطفال فى الحضانه .
    هههههه
    شكرا ليك يا هانى .
    موضوع مميز جدا

    25/4/09 18:59

     
  3. موناليزا
    فعلا إنا لله وإنا إليه راجعون

    ضـي
    طبعاً المثقفين موجودين، لكنهم للأسف أصبحوا شواذ لقاعدة الجهل والتخلف
    لكن بالنسبة للقصيدة فحرام عليكِ لما تقولي إنها مفيدة في تعليم الأطفال
    يبقى كده ضاع الجيل الجاي كمان
    :)

    28/4/09 16:58

     

Post a Comment